ОПРЕДЕЛЕНИЯ ВЛАДИМИРСКОГО СОБОРА 1274 ГОДА [1]

Правило Кюрила, митрополита роуськаго, съшьдъшихся епископ: Далмата нооугородьского, Игнатья ростовьского, Феогноста переяславьского, Симеона полотьскаго, на поставление епископа Серапиона володимирскаго

Преблагыи Бог наш, иже все промышление творит нашемоу спасению, и по неведомым соудьбам Его и по всему оустроению и ухыщрению Пресвятаго Его и Пречистаго Духа, все в оустроеноую вещь въводя, достоиныя и дарованьныя Его силы, святительскыя чести к всем опаснее приимъшим чистительство, с всяцем хранением опаснее блюсти святых правил пресвятых Апостол и по тех бывъших преподобных наших отец, жизньное слово имущих, своими пречистыми законоположении, акы некыми стенами чюдными оградившее Божию Церковь и камень твьрдости в основоу вложьше, иже клятъся Христос нераздроушене ей бытии от самого ада, яко надежю имам еже к нам реченое от Спасителя нашего: дьрзайте, аз победих мир. Тем бо аз Кюрил, смиреныи митрополит всея Роуси, многа оубо видением и слышанием неустроение церквах, ово сице дьржаща, ово инако, несъгласия многа и гроубости, или неоустроением пастоушьскым, или обычаем неразумия, или неприхожением епископ, или от неразоумных правил церковьных. Помрачении бо беахоу преже сего облаком моудрости елиньскаго языка, ныне же облисташа, рекше истолкованы быша и благодатью Божиею ясно сияют, неведения тмоу отгоняще и все просвещающее светъм разоумным и от грех избавляющее. Тем иже неведением прочее Бог да съхранит нас, а грех да простит, а о прочих святых правил да просветит ны Бог и вразоумит ны, никакоже престоупающе отечьскыя заповеди, горе наследуем. Кыи оубо прибыток наследовахом оставльше Божия правила? Не расея ли ны Бог по лицю всея земля? Не взяти ли быша гради наши? Не падоша ли сильнии наши князи острием меча? Не поведении ли быша в плен чада наша? Не запоустеша ли святыя Болжия церкви? Не томими ли есмы на всяк день от безбожьных и нечистых поган? Си вся бывают нам, зане не храним правил святых наших и преподобных Отец. Ныне же аз помыслих с святым Събором и с преподобными епископы некако о церковьных вещех испытание известьно творити.

Приде бо в слоухы наша, яко неции от братия нашея дьрзноуша продати священыи сан, и причитати я к церквам, и взимати от них некыя оурокы глаголемыя. И забыша правила реченаго святых Апостол и преподобных Отец наших. Да слышат ясно вси: поставленыи на мзде да извержеться, и поставлии его - правило се есть святых Апостол 29. пакы ищет правила 6-го Вселеньскаго сбора иже в Халкидоне правило 2: «Аще кто коупит и продает поставление, и аще ключяря церковнаго поставит на мъзде, в свом степени бедоу примет, рекше да извержеться, и ходатаиствоующии о таковем поставлении, аще соуть причетници, от своего степени извергоуться, аще ли мирьстии человеци, или мниси, да боудут проклятии ». Никтоже благодати Божия не продает: тоуне бо, рече, приясте, тоуне же и дадите. Видиши, како негодова Петр на Симона волхва, рече бо: сребро твое да боудет с тобою в пагоубоу, яко благодать Божию надеещися богатьством стяжати. Рече Елисеи к Гиезии: приял еси сребро Неоманово и ризы, нъ и проказа его прилепиться тобе и к семени твоемоу прилепиться в векы. Яко невзможно Богоу работати и мамоне, а злее есть Македоньскыя ереси. Македоний бо и прочии духоборци, раба Богоу хоуляще Духа Святаго глаголахоу; си же раба себе стваряюще, коупоующе и продающее, с Июдою сравнаються, имеют с ним часть, и да боудет отвержен и всея священичьскыя слоужбы лих и проклят. Оуже прочее, братие, слышим вси и не преслоушаемъся правил божествьных, да не когда отпадем, яко не златом, ни сребром искоуплени быхом от соуетнаго жития, нъ драгою кровию Агньца Божия непорочна, пречиста Христа. Такоже и нас наоучиша моужи священии, мы же последъствоуем еуангельскым и апостольскым и отчьскым заповедем, вероуем и глаголем; прочее от сего времени аще кто явиться от святого нашего Сбора, или игоумена в игоуменьство,, емля от него что, свящая на мзде, рекомое « посошное », или постризая мирьскаго попа на мьзде в игоуменьство, или попа поставляет к церкви, емля оу него что, да боудоут проклятии. Епископи же, егда хотят поставити попа или дьякона, да истяжют житье его, како боудет имел житье преже поставленья, да призовут заемыя соуседи, егоже знают издетьска, якоже правило седмое глаголет Феофила, архиепископа альксандрьскаго: «да сведят поставленые вьси священьници, аще единако смыслят , и тогда епископ да испытает, и пришедшим сведетельствовавшим о нем, да поставлен боудет. Поставление же втайне не бывает ». Но всем нам ведомо будет, егда како пришелец боудет иноя страны и оутаив съгрешение, оукрадет священие. «Не знаемаго же никакоже святити», яко 4-го Сбора 6-е правило глаголет, ни из иного в ин град поставити, аще от своего предела боудет, преже дажь не обещает, ни раба на священичьство привести, аще не преже господин его отпоустит предо многыми послухы с грамотою, и поустит, аможе хощет, и по поставлении да не присвоит к собе. Нъ хотящи поставлении бытии, да испытают их потонкоу, аще житие их чисто изъбрящет, девство съблюдъши, девицю по законоу приведъши, и законьномоу снятию бывшю, аще грамотоу добре сведят; нъ и тоу скоро их не поставляйте, аще боудоут не кощюньници, ни хыщници, ни пьяници, ни ротници, ни сварливи. Потом подобает испытати их о вещех греховных, еда в блоудьстве содомьстем были боудоут, ли с скотиною, ли в роукоу съгрешение, или в татбе, разве аще не детьскаго, ли преже поятия жены своея растлит девство, ли с многыми легал боудет, или от своея жены законьныя блоуд створил боудет, а или в лживее посушьстве был боудет, или оубийство створил боудет, волею или ноужею, или резовник, или челядь дроуча голодом и наготою, страдою насилье творя, или дани бегая, или чародеец. Аще кто от прежереченых сих вин хотя единою ят боудет, таковыи не может бытии поп, ни дыякон, ни причетник. Да кто свободен боудет от всех сих вин пороучением отца духовьнаго, понеже и пороучиться 7 поп инех с прочими добрыми сведители, да поставят и. Пьрвее даст емоу еоухию, еже есть молитва анагностьская об остризании причетническом, краткыи фелонь; ти потом да конархает в соборней церкви и чтет, дондеже възоумеет все, да предаст и епископ старейшемоу церковьномоу на оучение. По мнозех же дьнех боудет дьякон не мне полоу 30 лет, поп же не мне 30 лет. Не взимати же оу них ничтоже, разве якоже аз оуставих в митрополии, да боудет се в всех епископьях: да възмоут клирошане 7 гривен от поповьства и от дьяконьства от обоего. Аще ли кто по оуставе нашем боле сего емля от дьякона, ли от попа, или от игоумена, или от проскоурнице и от нищих, насилье деюще, или на жатвоу, или сенасечи, или провоз деяти, или иная некая «сборное» емлюще, или наместьники поставляюще на мьзде, или десятиньника, или егда божествьныя съборы собирая, тогда некако сбирание сбирают от властель церковных, или скареднаго деля прибытъка отлоучают некыя от церкве, не Божия деля закона, нъ своего ради прибытка, или оугодья некоего деля, таковыя отлучаем.

Понеже оуведехом о божествьнем крещеньи, смоутне некако и неразоумне смешающе мюро божествьное с маслом, и тако мажют по вьсемоу телоу крещаемаго, еже всего злее есть неразоумье, и не поминают правила реченаго в Лаодикии: «подобает просвещешемоуся святым крещьньемь в крещении мюром мазатися, мастью небесною , и причастьником бытии царьствия Христова »: - мюро особь, а масло особь. По оглашеньи бо мажют и маслом древяным, глаголюще: «мажеться раб Божии маслом радости в имя Отца и Сына и Святаго Духа и ныне и присно и в векы веком аминь», на всех съставех; ти потом да крещают и, погроужающе в три погроуженья в имя Отца, таче Сына, таче Святаго Духа и приглашают «аминь». Таже мажют и мюром по чювьством, глаголя: «печать и дар Святаго Духа». По инем же местом негдеже не мажют, разве на челе, на очью, на оушью, на ноздрею, на оустьноу, яко же в святых отца нашего Кюрила в оглашенных его словесех писано есть, рече бо: иже помазываемь маслом первее радости есть, рече, оброученье, имьже в истину крестьяне наречемъся, помазает ны Бог в оусыновленье славы Своея. Таче по крещении мюром мажем чювьства токмо, загражающе первыя льсти въход, и нетленьни стваряющеся пречистым Духом Божием, и присно храними от злокозньнаго врага, да никакоже нас не подьвигноут чювествы на зло: оушима на злослышанье, а очима на зловиденье, и оустьнама на зловкоушенье, ноздрьма на злообоняние, нъ присно благооухаеми и спасаеми, акы и церкы Божиа преочищена, хранима Духом Святым. Всякого же по крещении да сподобляют пречистаго Божия Тела и честьныя Крови, или в градех, или в селех, где но боудет крещаемыи. Боле да не обливают никогоже, но да погроужают: несть никдеже писано обливанье, нъ погроужанье в съсоуде отлоучене. Без причащенья же да не кроутят (крестят) никогоже.

Пакы же оуведехом бесовьская еще дьржаще обычая треклятых елин, в божествьныя праздьникы позоры некакы бесовьскыя творити, с свистанием и с кличем и выплем, съзывающе некы скаредныя пьяница, и бьющееся дрьколеем до самыя смерти, и възмающе от оубиваемых порты. На оукоризноу се бывает Божиим праздьником и на досажение Божиим церквам. Паче о сем досажают нашемоу Спасоу и Застоупоу, иже нас избави от проказы смертьныя и от тоугы дьяволя, и объвеселивыи сердца наша святыми честьными праздьникы, да познаем и помним спасенаго Его таиньства, да почитаем Его в святых Божиях церкъвах, в хвалоу и в песнь създавшаго нас, и прочее по нашемоу законоположению. Мы же последоуем святым и преподобным нашем отцем: аще кто изъобрящеться по сих правилех бещиные творя, да изгънани боудоут от святых Божиих церкв, оубиении да боудоут проклятии в сии век и в боудоущии. Аще нашемоу законоположению противяться, то ни приношения от них приимати, рекше просфоуры и коутьи, ни свечи. Аще и оумрет, то над них не ходят иереи и слоужбы за них да не творят, ни положити их близ Божиих церкв. Аще который поп дерзнет что створити над ними, да боудет чюжь своего сана.

Пакы обретохом в пределех новгородьскых дьяконы емлюща божествьныи Агньц, и преже попов проскоурмисание творящее, и потом пришедшем попом, после проскоурмисати. И забыша правила реченаго в Фругии 55: «дьяконом преже прозвитера не входити в святыи олтарь, ни попом преже епископа». Никейскаго же Сбора правило 18 писано бо есть сиче: «слышахом, рече, о некых, яко неции дьякони преже епископ благодарению прикасающееся. Повелеваем отселе дьяконом по попех възимати причащение ». Томоу же святому Сбору последоуем, отселе не повелеваем дьяконом Агньца вынимати, нъ попом. Аще кто обрящеться по нашеи заповеди се творя, негодованием епископ места того да извержеться, аще сведает, аще ли не весть, прощен боудет. Аще ли не покорящеся, нъ въпрекы глаголют, да боудоут вси извержении; аще ли люди молвоу начноут творити, да боудоут проклятии.

Понеже оуведехом в тех же странах неродьство творящее, бещинье святительско, оупивающеся без меры в святыя пречистыя дьни постеныя, От светлыя неделе верьбныя ДО Всех святых, яко не бытии божествьномоу приношению, ни божествьнаго крещения до всех святых: мы же последьствоуем божествьным правилом, глаголют бо : «поп оупиваяся, да останеться, ли да извержеться». Мы же заповедаем преподобным епископом: аще не покаеться, повелеваем всех изврещи. Лоуче бо един достойных слоужа, неже тысяща безаконьн. Аще ли явяться спиры творящее народы, не покоряющееся семоу правилоу, проклятии да боудоут.

Пакы же оуведехъм в тех же странах, яко нецыи несвящении освящают приносимая к церкви плодоносия, рекше кроупы или коутья за мертвыя, повелеваем от сего времени таковомоу не бытии, ни от дьяконов да не освящено. Писано бо есть в правиле 18 Никийскаго Сбора; пакы же Сбора иже в Лаодикии правило 15: «неосвященоу ни Пети, ни чисти на анбоне, или божествьнаго словесе людем почитати, аще священничьскаго постриженья на главе не имать, ни благословения от своего пастыря, по святым правилом, не приял боудет; аще приял боудет, обачеже и таковомоу несть инако како Пети или чисти на анбоне, аще не облечеться в белыя ризица. Малыя же ризица глаголеться гречьскым языком диффера или фелонь. Повелеваем же от селе в всех церквах ни Апостола чисти, ни прокимена пети, ни в олтарь входити неосвященомоу. Дьяк аже освящен боудет, да не прикасаеться к съсоудом освященым, ни святаго кандила никакоже да не дьрзнет принести, разве аще не дьякон или поп, ни самомоу томоу великомоу подьякоу. Пономарь же всем церквам от чистых да освящают, да не боудет всем просто входен святый Божий олтарь. Ничтоже да не весено боудет в Божий олтарь, ни коутья, ни ино что отиноудь. Поп, ни дьякон да не входят праздению, ни леностию, да не досажают пречистоумоу местоу, бещиноу въходя.

И се слышахом: в пределех новгородьскых невесты водят к воде. И ныне не велим тому тако бытии; аще ли, то проклинати повелеваем.

И се слышахом: в субботу вечер сбираються вкуп мужи и жены, и играют и плящут бестудно, и скверну деют в нощь святаго въскресения, яко Дионусов праздник празднуют нечестивии елени, вкупе мужи и жены, яко и кони вискают и ржут, и скверну деют. И ныне да останутся того, аще ли, то в преже реченый суд впадут.

О кресте, иже на земли и на леду пишют. Никтоже да не пишет на земли креста и на леду, егда воду крестят, да не оукаряемо боудет победное оружье наше. По крещении бо попирают ногами человеци, кони и весь скот и псы, потом и порты мыют и польют и сквернами. Не тем бо крестом освящаеться вода, доспеным на леду, нъ держимым священьничьскими руками. И неции глаголют, яко освятил есмь крест трижды и четырежды. И крестов много связавшее, вода крестити, и до осми дней в перенос носити, и потом разрешати кресты, - что сего несмысльства горее? Чьтуще и не разоумеем: да мы сотонины съблазны и многыми грехы связани, ищем крестом резрешитися. Крест бо освятился есть кровью Христовою и освящает вся - люди и водоу, а креста - никтоже: тъ како мы крест освящаем, вяжем и раздрешаем? Отселе не буди тако, аще ли, то проклинати повелеваем.

[1] Источник документа -. Памятники древне-русскаго каноническаго права, СПб, 1880г, ч. 1, стр. 84 - 102

Запись:

← Предыдущая